浪子回头做赢人

上村有个阿水三，十多年前二十零；
好嫖好赌好打扮，激到父母命都冷。

别人看佢像猴狗，背后喊佢贱骨头；
话佢难得有变世，全家都替佢发愁。

日赌夜赌输到光，纵欲过度眼落眶；
气得父母无气透，赶佢出门打流浪。

垂头丧气阿水三，浑浑噩噩到增城；
又无食来又无着，衫袖裤裆都穿坑。

行到城郊采石场，幸得遇到好老乡；
安排阿水做石料，放炮碎石响叮当。

老乡教育阿水三，做人爱求好名声。
今后你要走正路，捏起衫袖做到赢。

阿水住在集体房，每天工作好紧张；
再无心思去嫖赌，身体逐渐变强壮。

老乡热心帮助佢，对阿水像亲兄弟。
劳动最能改造人，阿水逐渐变好哩。

石场做哩十多年，娶哩老婆添哩丁；
银行存有八九万，今下阿水系自然。

浪子回头做到赢，阿水唔再坏名声；
亲房伯叔都欢喜，齐话咸鱼翻哩生。